قادینلار!

قادینلار!  

قادینی ایکینجی درجه لی „انسان“  وکیشی نی  اونا اوستون بیلمک ، قایناغینی پاتریارکال دینلردن  آلیب وایندیه قده ر بو دینلرین تاثیری آلتیندا اولان تؤپلوملاردا عنعنه و قانون کیمی حکم سورور:

„دیکباشلیق ائتمه ییندن قؤرخدوغونوز قادینلارا اؤیود وئرین، یاتاقدا تک بوراخین و نهایت دؤیون اونلاری …“

سوره النسا ، آیه 34

«اعرو والنساء یلزمن الحجال»  قادینلاری ائوده ساخلاماق اوچون پالتارسیز قؤیون.

محمد پیغمبر (نهج الفصاحه کتابی صفحه 220»

«اؤز امّتیمه شرابی و قادینی  بؤیوک فتنه تانیبب و اوندان قؤرخورام»

محمد پیغمبر (نهج الفصاحه کتابی صفحه 694»

« بیر قادین عطر ووروب بیر یئردن کئچسه  کی  اونون قؤخوسونو باشقالاری ایلییه بیلسین ، او قادین  زناکاردیر»

محمد پیغمبر (نهج الفصاحه کتابی صفحه 188»

«او گروه انسانلار کی اونلارین باشچیلیغینی بیر قادین اده ، هئچ  واخت رستگار اولمازلار»

محمد پیغمبر (نهج الفصاحه کتابی صفحه 683»

«جهنّمه باخیب، گؤردوم کی، اوردا اولانلارین چوخو قادینلاردی»

محمد پیغمبر (نهج الفصاحه کتابی صفحه 219»

«اگر قادین اولماسایدی، کیشی بهشته گئدردی»

محمد پیغمبر (نهج الفصاحه کتابی صفحه 653»

«النساء حباله الشیطان» قادینلار شیطانین تله لری دیر

محمد پیغمبر (نهج الفصاحه کتابی صفحه 789»

« جهره توخوماق قادینلارین باشینی مشغول ائتمک اوچون ان یاخشی ایش دیر» 

محمد پیغمبر (نهج الفصاحه کتابی صفحه 437»

منبع : نهج الفصاحه ،ترجمه ی ابوالقاسم پاینده ، انتشارات جاویدان، تهران

آنتیک دؤوروندن یادگار قالمیش بو ایکی فلسفی – الاهی روایتلری اوخویاق :

دئییرلر :

  بؤیوک اسکندرهندوکوش اراضی سینی فتح ائدندن سونرا او زامان سوقدیانا و بو گون ازبکستان آدلانان اؤلکه نین پادشاهی نین قیزی  روخانا ایله ائولنیر. اسکندر 2342 – ایل بوندان اول تئبن اؤلکه سینه ده غلبه چالیب و اورانی اؤز تابعیتی آلتینا آلیر. محاربه  قورتاراندان سونرا اسکندرین  قوشون سردارلاریندان بیریسی تیموکلئا آدلی عالیجناب بیر قادینا  تجاوز ائدیر و سونرا اونون گیزلتدیی خزینه و جواهیرات یئرینی بیلمک ایسته ییر. قادین حیطده اولان سو قویوسونو گؤستریر. سرداراگیلیب، سو قؤیوسونا باخارکن، قادین اونو آرخادان ایته له یب ، قؤیویا سالیر. سونرا حیطده اولان بوتؤ داشلاری قویویا آتیب و سرداری اؤلدورور. تیموکلئا اوشاقلاری ایله بیرلیکده اسکندرین حضورونا گتیریلیر و اسکندر بو قادینین شهامت و عملینه حیران قالاراق ، اونو آزاد بوراخیر.

میلاد دان 4 یوز ایل اوّل ، آتن شهرینده عاغیل وگؤزه ل لیکده مشهور اولان هته ره فورونه آدلی بیر قادین آتن شهری- نین محکمه سینده حاضیر اولور. اونون گناهی شنلیک بیر مراسیمده هامی نین قارشیسیندا سؤیونوب ، چیلپاق اولماقدیر.

بو عمل دینه قارشی بیر جنایت ساییلیر.محکمه ده  قادینین مدافعه  وکیلی دانیشاندان سونرا، قادین گؤزلنیلمه دن دوشلرینی چیخاریب ، حاکم لره گؤستریر. تعجب دن و تانری نین یاراتدیغی  گؤزه ل لیکدن واله اولموش حاکم لرهمان دقیقه هته رو فورونه نی آزاد اعلان ائدیرلر.

افسوسلار اولسون  بو فلسفه مضمون و ماهیت باخیمیندان مختلف دینلرده خصوصی ایله مونوتئیستی( تک الله لیق)  دینلرده  اؤزونه یئر آچا بیلمه یب و بشریتین انکشاف تاریخینده  قادینلارین اجتماعی طالع لرینه چئوریله بیلمیر.

 قادین تاریخی نی حاقسیزلیق و ظولم تاریخی آدلاندیرماق اولار.  قادین تاریخ بؤیو هریئرده تحقیر اولوب ، تجاووزا معروض قالیب،  یاندیریلیب ، دیری – دیری باسدیریلیب و اونون انسان حاقلاری ازیلیب دیر. بو گون دونیامیزدا موجود اولان دینلرین اکثریتینده قادین کیشی لرله برابر حقوقا مالیک اولا بیلمیر. بودیزم، هندوایزم، یهودیت، اسلام و مسیحیت دینی نین  قانونلارینا گؤره،  قادینین یوکسک دینی درجه یه و مؤوقعیته مالیک اولماسی غیر مومکوندور.

 اسلامی اولکه لرده 1350-1300 ایل بوندان اوّل قادینلارحاققیندا دئیلمیش و یازیلمیش سؤزلرهله اعتبارلی  قانونلار کیمی  اجرا اولور. قادینلار داشقالاق ائدیلیر، سیاسی زندانلاردا اعداما محکوم اولان قیزلارا اعدام اولمادان اول تجاوز اولور. 9 یاشیندا اولان قیز اوشاقلاری ائولندیریلیر. باش اؤرتوکو اولمایان قادین جزالانیر… طالبان رژیمی نین باشچی سی ملا یار محمد دئیردی :

“ باش اؤرتوکلری اولمایان قادینلار، حیوان کیمی موجودلاردیر“ .

انسانلارین عاغیل تاریخی نین انکشاف پروسه سینده  ان پؤزغون جهت بوندان عبارت اولموشدور کی ، کیشی لرهم سادیسم  حیسّیاتلارینا گؤره  و همده  فیزیکی باخیمدان قادینلاردان گوجلو اولدوقلارینا گؤره  اؤزلرینی قادینلاردان اوستون بیلمیش لر.

یهودیت و مسیحیت دینلرینین ایلک حکایه لرینده حضرت حوّا و حضرت آدم تانری نین  برابر حقوقلو مخلوقلاری کیمی یارانیب و بهشت ده یاشامیشلار. بو دینلرین سونراکی تاریخینده  حوا حضرت آدمین قابیرغاسیندان یارانمیش بیر مخلوق و  جنّتده ایلانین مکرینه اویموش و آدم پیغمبری تؤولامیش بیرانسان کیمی گؤستریلمیشدیر. باشقا سؤزله قادین شیطانین نفس – امّاره سی کیمی، کیشی نی تؤولایان و گناها باتیران بیر موجود دور.

مسیحیت دینینده حضرت مریم بیر قادین اولاراق کیشیه احتیاجی اولمادان آللاهین اوغلونو دوغموش و دونیانی قورتارمیشدیر. بو بیر قادین اوچون یوکسک بیر مقام و حورمت دیر. لاکین قادینین یوکسلمه سی کلیسا کاهینلری  اوچون بیر فاجعه دیر.       

17 – نجی عصرین سونونا قده ر کلیسا  حاکمیت باشیندا اولارکن ، قادینلارا قارشی رحم سیز و انسانلیقدان اوزاق بیر سیاست ایره لی سورموشدور. انسانین وجودو هم روح و هم بدندن (جسمدن)  ترکیب تاپمیش اعلان ائدیلمیش. روح تمیز و بدن یعنی جنسی احتیاجات پیس ساییلمیش.  یوزمینلرله  قادین اروپا و کریستیان اؤلکه لرینین انگیویزاسیون محکمه لرینده کیلسا روحانیلری طرفیندن جادوگر آدلاناراق یاندیریلمیشدیر.          

قرآندا و حدیثلرده آنالارو قادینلار حاققیند ا بعضی  یاخشی سؤزلرده دئیلیب. لاکین بونلارا رغما اسلام دینیده قادینلارایکینجی درجه لی موجودلاردیر. کیشی نین قادینا  اوستونلویو وار . او 4 قادین آلماغا و اونون یانیندا بیر نئچه کنیزی اولماغا حاققی وار. کیشی نین قادینی دؤیمه یه حاققی وار. قادین کیشی نین یاریسیجان ارث آپاریر. ایکی قادینین شهادتی بیر کیشی نین شهادتی قدر ده یه ری وار و…

 محمد پیغمبر  قادینا اینانمیر. او کیشی نین اؤز جنسی هوسینه  غلبه چالماغینا دا اینانمیر . اونون اوچون آنجاق جنسی هوس وار، عاغیل و اؤزونو کنترول ائتمک یوخ. بو اوچون او قادینی کیشیدن آییر، باشینا اؤرتوک اؤرتدورور و کیشینی اونا حاکم ائدیر.

  اسلام دینینده ، کیشی نین قادینا اوستونلوک تاپماسی ، هلنیزم کولتورونون تاثیری آلتیندا اولان عربلرین عبادت ائتدیکلری الهه لرین « آللات (یونانلارین آتنا الهه سی نین بدلی)، ال عذّا (یونانلارین ونوس الهه سی نین بدلی) و مانات (بابلیون لرین طالع الهه سی نین بدلی) »  معبدلرینین یئرله یکسان ادیلمه سی وگؤزتچیلرینین فتوا گوجوایله  قتله یئتیریلمه سیله سونا چاتیر. قادین حاققیندا محمد پیغمبرین نهج الفصاحه  و حضرت علی نین نهج البلاغه سینده   اولان فیکیرلریله تانیش اولماغیمیز یاخشی دیر. بو سؤزلری اؤخویوب ، بیلیب و اونلاردان نتیجه لریمیزی آلمالییق.       

بیز بیلمه لییک کی، مدرن دونیامیزدا 1300 – ایل بوندان اول  یازیلان قانونلار و خطابه لرکهنه لمیش و ایشدن دوشموش سؤزلردی. 21 – عصرده  دموکراسی و مدرنیزم قادینلارلا کیشی لرین برابرحقوقلواولمالارینی طلب ائدیر و بو پرنسیبی هراجتماعی ساحه ده حیاتا کئچیریر. قادینلارکیشی لرین باجیلاری، آنالاری، قیزلاری و حیات یولداشلاری دیلار.  گون او گون اولسون کی بیزیم  قادینلار اؤزلرینی جهالت و خرافات زنجیرلریندن آزاد ائدیب و آزاد روح ایله قیز و اوغوللارینی تربیت ائد سینلر. گون او گون اولسون کی  قادینلاریمیزعلم ، تکنیک، سیاست و اجتماعی فعالیت لرده کیشی لرله چیین – چیینه  آذربایجانیمیزی سعادت و ترقی یولونا سوق وئریب و ملتیمیزی مترقی و متمدن ملت لرین عائله سینده باش اوجا ائدسینلر.

 سینسین او ال لر کی قادینی دؤیمه یه قالخیر!!!

 یاشاسین آزاد، دموکراتیک و مدرن آذربایجان!